Frussa - ibbum Goggana

Ég var að koma heim frá 17. júní hátíð á Amager Strand.

Ekki bjóst ég við að nokkurntíma í útlandi myndi ég rekast á svo marga fjölskyldumeðlimi mínu í einu. Þarna voru líka ansi margir úr "hinni fjölskyldunni", þ.e. Íslensku fólki sem ekki drekkur áfengi (lengur). Ég þekkti því helminginn af liðinu.
Það var ekta 17. júní veður, rok og rigning.
SS pulsur, Lindubuff, Nizza, Hraun og Opal.
Lúðrasveit og kór.
Fjallkonukeppni þar sem kona í þjóðbúning var eini keppandinn.
Blak keppni milli þriggja liða frá kvennakórnum og tveggja liða frá sendiráðinu.
Og auðvitað ræða.

Þorsteinn Pálsson flutti ræðuna. Hann sagði meðal annars að Íslendingar hefðu löngum ferðast til Danmerkur til að drekka í sig frelsisandann. Allir með greindarvísitölu hlógu.
Hann bætti því við að SS pylsur væru mikilvægar til að næra sálir Íslendinga, sökum smæðar þjóðarinnar.

Þetta þótti okkur líka fyndið.

Það var alveg ofsalega gaman þó við færum áður en blakkeppnin byrjaði. Það var nú svona nokkuð augljóst hvernig það færi í rokinu.

Gleðilega þjóðhátíð.

Jæja nú jæja. Fjölnýtilegasta orðskrýpi sem íslensk tunga skartar: jæja. Ég get nú vart orða bundist af gleði þar sem ég hef tekið eftir því að Langalöng Hammers hefur nú bæst í blogg-glaðan hóp.

Hér sit ég á Laugum og var að fá spurningu frá næturverðinum: ,,Hættir þú aldrei?" Ég var næstum því búinn að segja honum söguna af því þegar ég hætti hjá Fosshótel með súran svip í smettinu eftir misheppnaða vinnuferð í Hólminn, þar sem Lavi var hundeltur af þroskaheftum manni með hamar á lofti hérna um árið. Hætti hins vegar við á síðustu stundu. Sagði fátt.

Merkilegt hvað allir dagar eru eins á Laugum. Ég veit ekki lengur hvort það er virkur dagur eða helgi, dagur eða nótt, hvort ég er að koma í vinnuna eða fara. En það er allavega útskrift hjá Helgu á morgun, öllum boðið á Players upp úr tíu.

Gott ef Dr. Næturvakt var ekki að vísa í auglýsinguna um lyktareyðinn sem maður skammast sín fyrir....

Lavi, við erum varla einir mikið lengur.

Í gær var bleikur dagur á Íslandi og í dag geng ég áfram með bleika nælu til heiðurs frændsystkinum mínum tveimur sem fæddust á þessum degi.

Tutla mín, mig langar að spyrja nánar út í svelta köttinn; fékk hann þerapíu? Ég þekki nefnilega svona svelta mannveru sem þarf að borða allt sem hún sér.

Ástarkveðjur til allra, kvenna og kallra.

Gleðilega þjóðhátíð!
Ása mín varð 10 ára í dag! Það var fámennt en góðmennt í 17. júní kaffinu. Við fórum svo á Hard-rock til afmælismáltíðar, afmælisbarnið fékk ís með stjörnuljósi og afmælissöng!

Ath: Stjörnuljós geta brennt þó að það sé hætt að loga!!

Það er stöðugt rót á heimilinu, Sam er í Bretlandi (kemur 12/7), Luisa fer frá Íslandi til Þýskalands(28/6), Gulla kemur "bráðum" (30/6), Spænskurnar koma og verða í viku (3/7), hamstrar fjölga sér, Neró er fluttur (17/6).

Langalöng

Hæ allir!
Það var sko ekki bara fjölgun hjá Lava heldur varð Langalöng "amma". Það fæddust nefnilega hamstrar 3 eða 4 en eru reyndar nú 2. Þeir voru nefnilega tveir þeir Snar og Snöggur hjá honum Lárusi. Það sýnir sig að erfitt er að greina kynin því Snöggur eignaðist unga og næsta ljóst er að hann hefur ekki farið í kynskiptiaðgerð. En af reynslu minni sem dýra-mamma má Tutla Hammers og aðrir þiggja góð ráð:
- Ástargaukar hafa hátt og eru óttalegir sóðar, þeir vilja helst vera lausir úr búrinu og þurfa félagsskap!
- Hamstrar eru yndislegir, krefjast einskis, þarf ekki að hleypa út úr búri, kvk skila af sér meiri hlandlykt en kk og ef kynin eru blönduð þá eignast þau unga! Hægt er að skilja þá eftir í allt að 3 vikur ef þess er gætt að hafa nægilegt fæði (allavega 2 vikur)!
- Hundar lykta, fara úr hárum (ekki allir), þarf að fara með þá út, gefa þeim að éta, hreinsa upp eftir þá skítinn, greiða, klippa neglur, viðhalda hreyfingu, krefjast mikils ef á að sinna þeim vel. Hundar eru gasalega sætir þegar þeir eru hvolpar! Hundar þurfa mikinn aga! Fyrirhöfnin minnkar ekki þó að maður hafi þá með i ferðalög!
- Fiskar krefjast ekki mikils, þeir deyja hinsvegar ef þeir fá ekki að borða og það þarf að gefa þeim að borða daglega, fiskabúr eru sérlega leiðinleg að þrífa ef þau eru ekki með rándýrum útbúnaði, það er ekki góð lykt úr fiskabúrum!
- Froskar eru soldið skemmtilegri en fiskarnir, þola lengur matarlausir, en annars mjög svipað!
- Kettir eru meira sjálfbjarga en hundar, þeir veiða fugla, drepa hamstra, skíta og míga sjálfir (þessvegna í annara manna görðum) og þrífa sig sjálfir. Það er auðvelt að ferðast með kött ef hann er ekki bílveikur!

Já, humm, ég vildi bara segja að ég hef nú komist inn á heimasíðu Monzu og heimasíðu dóttur Lava.
Stórglæsilegar heimasíður, það verð ég að segja.
Pínulitlustu hvolpar sem ég hef á ævi minni séð!

Tutla hefur lagt hvolpadrauma á hilluna. Það stendur nebblega í húsreglum hér að ekki megi hafa gæludýr í húsinu nema maður hafi átt þau þegar maður flutti inn. Eins var mér bent á að maður eigi ekki að fá sér hund í stað kærasta, þó hundurinn hafi kosti fram yfir kærastann, þá hafi kærasti aðra kosti fram yfir hund.
Ekki að hvolpadraumarnir hafi verið annað en draumar.

Heiðinn Hammers kom í heimsókn í dag. Honum gengur vel í prófum og lífinu generelt. Það er unun að sjá svo hamingjusaman mann í miðjum prófum. Samfélagsmál voru rædd, að vonum, pitsa etin og kaffi drukkið. Ljúfir eru Sunnudagar.